За концертот на млади

Во рамките на својата редовна концертна програма која ја сочинуваат настапи на реномирани музички уметници од Македонија и странство, фестивалот „Златна лира“ традиционално го отстапува својот подиум на младите уметници со цел нивна промоција и афирмација на почетокот на концертната кариера. Ваквата можност да го претстават својот талент на професионалниот концертен подиум е особено значајна за младите музичари и нивниот понатамошен развој и напредок на уметничкиот пат. Фестивалскиот подиум на млади на „Златна лира“ овозможува да се создаде компактна, генерална слика за тоа, каква е патека на движење и развој на македонското исполнителство .
 
Во таа смисла, последниве години, СМУМ соработува со меѓународниот натпревар на млади музичари „Охридски бисери“, кој од 2002 година се одржува на годишно ниво во Охрид и опфаќа учесници во повеќе категории и дисциплини од целиот свет. Плод на таа соработка е наградата за најдобар учесник на натпреварот од Македонија која ја доделува токму здружението СМУМ, а се состои од организација на концерт во рамките на фестивалот „Златна лира“.


На фотографијата: Мевљуд Асаноски, кларинет

Во сабота, на 21 октомври на концертниот подиум ќе ги видиме младите уметници Мерт Рустемов (кларинет), Стефан Трајаноски (саксофон), Мевљуд Асаноски (кларинет), Ѓорѓи Димовски (саксофон) и Арсениј Ангелески (пијано) кои ќе изведат дела на Кепке, Шостакович, Руеф, Вебер, Менделсон и Крепин.

Пијано триото е создадено во 2022 година од страна на проф. м-р. Горан Трајковски. Го сочинуваат Мевљуд Асаноски (кларинет), Ѓорѓи Димовски (саксофон) и Арсениј Ангелески (пијано). На натпреварот ,,Охридски бисери” освојуваат Втора награда во Б-категорија.

Влезот на концертот е слободен.